Nostra Madonna di Loreto, una nuova poesia di Silvana Trimboli

Silvana, mia cugina, dei Trimboli parlini o come si trova in documenti antichi perlini, 

è già nota su questi schermi per la sua arte poetica. Puro vernacolo calabrese, Silvana si rivela nuovamente portatrice e custode di tradizioni, folcklore e fede. A voi la lettura (con ascolto).

Madonna di Luritu

Nta stu paisi e pedi da muntagna

U 10 Dicembri è festa magna.

Na gran Signora veni ricordata

Madonna di Luritu esti chjamata.

Nui la pregamu e simu felici

esti la nostra protettrici.

Patruna di tutti i soi devoti

di chista valli e di li pratioti.

Viva Maria di stelle ncurunata

Madonna di Luritu esti chjamata.

U 10 Dicembri di tant’anni arretu

la Santa Casa fu portata a Loretu.

L’Angiali chi si stannu attornu attornu

in volo a trasportaru chju jornu.

Nta ja Santa Casa lu Verbu s’incarnau,

Maria, madre e sposa diventau

dill’ Arcangelu annunziata

rrestau pura e mmaculata.

Viva Maria la bella Annunziata

Madonna di Luritu è la Beata.

Ssettata nta ju tronu cu grandi maestà

ncuntru a nu indi veni pa li nostri necessità.

Lu Santu Bambinu chi mbrazza lu teniti

pregatilu pa nnui mu ndi sana li feriti.

U sana i cori afflitti e scunsulati,

u sana lu corpu di tutti li malati.

E vui chi siti l’avvocata di li disperati

cumpagnia facisti quandu sunnu assulicati.

Viva Maria la cunsulatrici

Madonna di Luritu è la nostra protettrici.

Sutta u vostru mantu mentiti a tutti quanti

picciuli, randi e puru l’emigranti.

Dassaru stu paisi in cerca di fortuna

ma appressu si portaru a Vui comu patruna.

E se arretu jimu nte tempi passati

Vi ringraziamu pa tutti i pericoli scanzati.

Nte tempesti d’acqua, terremoti, e pandemia

sempri a Vuindi rivolgimu Vergini Maria.

Viva Maria, madre di Salvezza

Madonna di Luritu gloriusa e benedetta.

Preghiera alla Madonna di Luritu

Madonna di Luritu

ch’in processioni jiti

pa tuttu lu paisi

la “Benvenuta” siti.

Proteggiti tutti i figghj,

benediciti li famigghj,

cunsulati i tribolati,

sanati li malati.

Ccumpagnatindi pa la via

Sagratissima Maria.

Nui cercamu u vostru amuri

ca simu peccaturi.

Li nostri peccati perdunati

e non nd’abbandunati,

volimu godiri l’eternità

cu vui, mamma di bontà.

E nta sta jornata sagrata e bella

a paci cercamu Vergini bella

pa celu, pa mari e supra a sta terra

nui Vi pregamu u fermati la guerra.

Viva Maria, Regina della Pace

A Madonna di Luritu mu nda faci.

dicembre 2022, Silvana Trimboli